У межах серыі «Сухавей» мы імкнёмся рабіць піва, якое максімальна нагадвае шампанскае ці віно. Сусла ў такіх гатунках падкісляецца і зброджваецца «ў нуль», каб цела было максімальна сухім і мела падобнае на віно кіслінку, а для ахмялення выкарыстоўваюцца гатункі, якія могуць прыўнесці адмысловыя адценні. Мы зноў дадалі нямецкі хмель Hallertau Blanc, які ў піве раскрываецца ноткамі вінаграднага лісця, агрэсту і чорнай парэчкі — быццам сапраўдны савіньён-блан. Але ў гэты раз мы пайшлі яшчэ далей, і дадалі на даспяванне непасрэдна сок белага вінаграду. Дзякуючы яму наш «Сухавей» займеў новыя фруктовыя нюансы з характэрным профілем цытрусавай садавіны, ружы, фенхелю, якія разам з высокай карбанізацыяй, сухім целам і высокім утрыманнем алкаголю зрабіў наша піва амаль не адрозным ад пеністага віна.