Мы ўжо рабілі таматнае піва з перцам Chocolate Habanero, і былі вельмі задаволеныя вынікам. Таму мы зноў звярнуліся да каралевы вострых перцаў 42peppers, каб здабыць гэты гатунак для нашага піва. Ён паходзіць з карыбскіх выспаў Трынідад і Табаго і джаліць, як скарпіён (больш за мільён адзінак па шкале Сковіла — адзін з найбольш вострых перцаў у свеце!), ад чаго і мае такую назву. На гэты раз да яго ў пару мы выбралі класічны чылі, які мае як выразны востры смак, так і прыемны пах з шырокай палітрай адценняў. Як заўсёды, базай да пякучых дадаткаў стала шчыльнае таматнае цела з дымам, чорным перцам і часныком, што агулам стварае шматгранны і цікавы напой.