У новае піва ў серыі звышлёгкіх і суперпіткіх NEIPA «Мроіва» мы дадалі эксперыментальны хмель пад кодавай назвай HBC 630. Ён выведзены кампаніяй Hop Breeding Company у 2008 годзе ў выніку скрыжавання двух другіх гатункаў, якія масава не культываваліся. Селекцыяй хмелеводы засталіся задаволеныя, і HBC 630 пачалі рыхтаваць да камерцыйнага распаўсюду. Але для таго, каб ён стаў даступны для шырокага кола вытворцаў і спажыўцоў, спатрэбілася больш за дзесяць гадоў. HBC 630 мае насычаны і складаны профіль, які характарызуецца выразнымі адценнямі вішняў і малінаў, а таксама высокім утрыманнем эстэраў і лактонаў, падобных на цукаты, што надаюць піву мяккія ноткі персіка і банана. Усё гэта разам з мутна-жоўтым колерам, лёгкім целам і асвяжальным смакам робіць піва ідэальным для таго, каб спатоліць смагу.