Мы працягваем спалучаць ягады і садавіну разам з зёлкамі ў нашых гатунках у стылі берлінер вайсэ, якія мы робім аўтэнтычным метадам змешанай ферментацыі. Гэтым разам мы выкарысталі ўлюбёную нашу ягаду — абляпіху. Яна была сабраная і захаваная на адной з беларускіх фермерскіх гаспадарак на поўначы краіны. Дзякуючы ёй піва атрымала насычаны профіль з характэрнымі алеіста-эстэрнымі тонамі ў паху і выразную кіслінку ў смаку. Таксама мы дадалі свежы перацёрты базілік, які прыўнёс духмяныя травяністыя і далікатныя вострыя ноткі. Вынікам стала піва замутнёна-саламянага колеру з асвяжальным смакам, якое цудоўна пасуе да цяперашняй спёкі.