Дзверы ў апошні месяц лета мы адчыняем з дапамогай новай лінейкі піва «Абшар». У яе межах будуць выпускацца так званыя белыя IPA — ахмеленыя элі, у базе якіх прысутнічае вялікая колькасць пшанічнага соладу ці пшанічных шматкоў. Дзякуючы гэтаму такія IPA маюць больш мяккі профіль, што робіць піва максімальна піткім. У першым гатунку за хмелевы профіль адказвае Ekuanot. Ён прыўнёс выразныя цытрусавыя і ягадныя ноткі ў паху, а таксама працяглую, але лагодную горыч у смаку без залішніх травяністых адценняў. Фініш — з лёгкімі тонамі чорнага перцу, вінаграду і хвоі.